Ukraina prezidenti Vladimir Zelenskiy bugun, 10 oktyabr kuni Kiyevda ukrain va xalqaro jurnalistlar savollariga javob beradi.
Matbuot marafoni noodatiy tarzda, Kyiv Food Market oziq-ovqat bozori hududida bo‘lib o‘tadi. Marafonda qatnashish uchun 300 dan ortiq jurnalist ro‘yxatdan o‘tgan bo‘lib, ular bir nechta guruhlarga ajratilgan. Har bir guruh 7-10 kishidan iborat va bir guruhdagi jurnalistlarning savollariga 20-30 daqiqa vaqt ajratiladi.
Marafon aynan qancha vaqt davom etishi hozircha noma’lum, Ukraina prezidenti matbuot xizmati bu jarayon 6-13 soat atrofida bo‘lishi haqida aytgan. Taqqoslash uchun: Rossiya prezidenti Vladimir Putinning har yilgi matbuot anjumani davomiyligi kamdan-kam hollarda 4 soatga yetadi.
Zelenskiy quyidagi savollarga aniq javob berishi kutilmoqda:
– 2019 yil yozida AQSh prezidenti Donald Tramp bilan bo‘lib o‘tgan va keyinchalik mojarolarga sabab bo‘lgan suhbat;
– yaqinda Rossiya qamoqxonalaridan ozod qilingan ukrain harbiylari va yana asir almashish ehtimoli bormi;
– Donbassda tinchlik o‘rnatish shart-sharoitlari;
– Zelenskiyga yaqin deb ko‘riladigan oligarx Igor Kolomoyskiy, ma’muriyat rahbari Aleksey Bogdan va boshqa amaldorlar haqidagi savollar.
Matbuot marafonini YouTube va Facebook orqali bevosita kuzatib borish mumkin.