Эрон Ислом Республикаси президенти Ҳасан Руҳонийнинг қасамёд маросимида парламент депутатларининг ўзларини номаъқул тутишлари мамлакат аҳолисининг норозилигига сабаб бўлди, деб хабар бермоқда Russian today​ телеканали.

Ҳасан Руҳонийнинг иккинчи муддатга президентлик вазифасига киришиш маросими ўтган ҳафта бўлиб ўтган эди. Маросимда Европа Иттифоқининг ташқи ишлар ва хавфсизлик сиёсати масалалари раҳбари Федерика Могерини ҳам иштирок этган.

Италиялик дипломат аёлнинг ташрифи вақтида эронлик сиёсатчилар ўзларини тута олмай қолганлар. Ўндан ортиқ депутатлар парламент биносида европалик дипломатни ўраб олишган. Қўлларида смартфонлар бўлган депутатлар Могеринини суратга ола бошлашган бўлса, айрим депутатлар у билан суратга тушишга интилишган.

Ижтимоий тармоқларда тарқалган суратлардан селфи тушиш учун депутатлар Могерини томонга столлар узра ошиб ўтишдан ҳам тойишмаганини кўриш мумкин. Парламент аъзоларининг бундай ножўя хатти-ҳаракатлари Эрон матбуоти ва ижтимоий тармоқларда мунозараларга сабаб бўлган.

Фарс ахборот агентлиги депутатлар ҳаракатини «ғалати» деб атаган бўлса, ижтимоий тармоқ фойдаланувчилари муҳокамаларида “шармандали селфи” деб номлашган. Интернет фойдаланувчилари томонидан депутатларни ҳажв қилувчи суратлар тарқатилган.