Туркия президенти Ражаб Тойиб Эрдўғон Суриядаги вазият юзасидан Москва ва Анқара ўртасида келишмовчилик йўқ, деб ҳисоблайди. У Hurriyet газетасига берган интервьюсида бунга тўхталиб ўтди.
“Идлибда ҳозир айнан биз Россия билан келишиб олган жараёнлар кетмоқда. Бу масалада ихтилофимиз йўқ”, деб айтди Туркия президенти.
Эрдўғоннинг айтишича, Суриядаги аҳволни яхшилаш бўйича 14-15 сентябр куни Остонада ўтказиладиган учрашувдан конструктив мулоқотни давом эттиришга умид қилса бўлади.
Туркия, Россия ва Эрон Сурияда хавфсизлик зонаси барпо қилиниши ҳақидаги меморандумни кафолатловчи мамлакатлар бўлади. Меморандум шу йилнинг 4 майида Остона шаҳрида имзоланган. Келишувга биноан Идлиб провинциясида; Латакия, Ҳалаб ва Ҳама ҳудудларида; Шарқий Ғутада ҳамда мамлакат жанубидаги Дераа ва Қунайтра провинцияларида бир нечта хавфсизлик зоналари яратилиши зарурдир.
Сурия президенти Башар Асадга қарши бошланган исёнлар 2011 йилдан бери давом этмоқда.