Туркияда қамоққа олинган америкалик руҳоний Фатҳуллоҳ Гуленни қўлга киритиш эвазига озод қилиниши мумкин. Reuters ​ агентлиги хабар беришича, Туркия Жумҳурияти президенти Ражаб Тоййиб Эрдўғон АҚШга диний раҳнамоларни айирбошлашни таклиф қилган.

Туркия ҳукумати АҚШда истиқомат қиладиган диний уламо Фатҳуллоҳ Гуленни 2016 йилнинг июль ойида ҳарбийларнинг давлат тўнтариши ўтказишига уринишда айблаб келади. Фатҳуллоҳ Гуленнинг ўзи бу айбловларни рад этганига қарамасдан, Туркия АҚШдан мухолифат етакчисини экстрадиция қилишни талаб қилмоқда. АҚШ ҳукумати эса Гуленни Туркияга топшириш учун унинг жиноятларига доир етарлича далиллар тақдим қилинмаганини маълум қилган.

Америкалик протестант миссионери Эндрю Брансон ўтган йилнинг октябр ойида Гулен бошқарадиган тақиқланган ташкилотга аъзоликда гумон қилиниб ҳибсга олинган. Ўша вақтда америкалик руҳоний Измирдаги протестантлик черковига раҳбарлик қилар эди. Унга нисбатан террорчи ташкилотга аъзолик бўйича жиноят иши очилган. АҚШ ҳукумати Брансоннинг қамоққа олиниши хато бўлганини таъкидлаб, фуқаросини озод қилишни талаб қилган.

Анқарадаги президент саройида полиция зобитлари билан бўлган учрашувда Ражаб Тоййиб Эрдўғон америкалик руҳоний ва Гуленни ўзаро алмаштириш мумкинлиги ҳақида гапирган. Шу йилнинг август ойида қабул қилинган норматив ҳужжат Эрдўғонга «мильлий хавфсизлик ёки миллий манфаатлар талаб қилган тақдирда», Туркияда ҳибсга олинган ёки айбдор деб топилган чет элликларни бошқа мамлакатлардаги шахслар билан алмаштириш ҳуқуқини берган.