Иорданиялик жуфтлик  бепуштликка олиб келувчи ўта кам учрайдиган касаллик билан оғриган эдилар. Улар америкалик олимларига фарзанд кўришга ёрдам беришларини сўраб мурожаат қилишди,  дея хабар бермоқда "РИА Новости".
 
Марказий асаб тизими билан боғлиқ Лея синдромига чалинган аёл ва унинг турмуш ўртоғи қарийб 20 йил давомида бефарзандликдан азият чекишган. Аслини олганда, улар фарзанд кўришган. Аммо аёлдаги ушбу синдром боис биринчи фарзандлари 6 ёшида, иккинчиси эса 8 ойлик вақтида оламдан кўз юмган. Шу боис, яна фарзанд кўриш ва унинг ҳам айни синдромни “мерос” қилиб олишидан қўрққан жуфтлик Нью-Йоркдаги Нью-Хоуп Оналик Маркази профессори, олим Жон Чзан ҳузурига ушбу ўта қийин вазиятда ёрдам беришини сўраб келишган.
 
Уларга ёрдам бериш истагида тадқиқот ишларига киришиб кетган профессор Жон Чзан масалага ечим топиш учун бошқа, учинчи бир аёлнинг генетик материалидан фойдаланишга аҳд қилди. АҚШда бундай тадқиқотларни ўтказиш тақиқлангани боис, жараён Мексикадаги клиникаларнинг бирида амалга оширилди. Бундай ҳолатларда ҳомиладорликни кўтарувчи аёлнинг тухум ҳужайрасидаги ядро хромасомалари билан олиб ташланади ва бошқа аёлнинг тухум ҳужайрасидаги ядро ўрнатилади. Айнан шу кўзга кўринмайдиган, аммо мураккаб жараён туфайли алмашинув сабабли чақалоқ уч ота-онадан дунёга келган саналади.
 
Абраҳим Ҳасан деб исм қўйилган болакайнинг дунёга келганига 5 ой бўлган бўлсада, у ҳақидаги маълумотлар ОАВга шу бугунгача ошкор қилинмаган эди.

Нашр эслатишича, 2015 йил февралида Буюк Британия уч ота-она ДНКсидан фойдаланиб сунъий уруғлантириш жараёнига рухсат берган биринчи мамлакат бўлди. Британиялик олимлар бундай туғилиш техникаси митохондриал касалликдан азоб чекувчи беморлар учун хавфсиз деган хулосага келган эди.