Жорий йил ёзида “Форбс” журнали (АҚШ) энг катта ҳақ оладиган спортчилар рўйхатини эълон қилди ва ундаги етакчилик илк бор бир футболчи – Криштиану Роналдуга насиб этди. Ҳисоб-китобларга кўра, Роналду бир йил давомида 88 миллион доллар ишлаб топган. Бунинг 56 миллион долларини (маош ва бонуслар) “Реал” клуби тўлаган бўлса, 23 миллион доллари рекламалардан келган.
7 ноябрь куни португалиялик спортчи “Реал” клуби билан шартномасини 2021 йилгача чўзди. Икки томон қанчага келишгани ошкор этилмади, аммо испан ва португал оммавий ахборот воситаларида Роналду йилига 23,6 миллион евро олиши (солиқларни чиқариб ташлагандан кейин, бироқ бонусларсиз) ҳақида ёзиб чиқди. 8 ноябрь куни эса Tmz.com портали Криштиану Роналду Nike компанияси билан умрининг охиригача ҳамкорлик қилишга келишиб олгани тўғрисида хабар берди, келишувнинг нархи эса 1 миллиард доллардан зиёд экани айтилмоқда.
Афтидан, футбол юлдузи энг бой спортчилар рейтингидаги биринчилигини келгуси йилда ҳам сақлаб қолади.
Хўш, Роналдунинг бунчалик бойиб кетишининг сабаби нима?
Биринчи сабаб: спортдаги муваффақиятлари. Криштиану 18 ёшида машҳур клуб – “Манчестер Юнайтед” сафига қўшилди. Португалия пойтахти Лиссабонда “Жозе Алваладе” стадиони очилиши муносабати билан 2003 йилнинг августида маҳаллий “Спортинг” ва “Манчестер Юнайтед” жамоалари ўртасида ўртоқлик учрашуви ўтказилди. 28-рақам остида майдонга тушган Роналду меҳмон футболчиларда шунчалик катта таассурот уйғотдики, улар танаффус пайтидаёқ мураббий Алекс Фергюсонга Роналдуни зудлик билан Манчестерга таклиф этиш кераклигини айтишди. Бироқ улар айтмаса ҳам, сэр Алекс буни аллақачон тушуниб етган эди. Тез орада Роналду “Манчестер Юнайтед” билан беш йиллик шартнома имзолади (маоши – ҳафтасига 35 минг фунт стерлинг), “Спортинг” эса айрилган футболчиси учун 12,2 миллион фунт стерлинг олди. “Манчестер”да ўтказилган олти мавсум Криштиануни энг қиммат ва маҳоратли футболчига айлантирди. 2008 йилда у ФИФА версияси бўйича дунёнинг энг яхши футболчиси деб топилди, ўша йили “Олтин бутса”ли бўлди, France Football журнали унга “Олтин тўп”ни муносиб кўрди. 2009 йилда Роналду Мадриднинг “Реал” клубига ўтиши учун рекорд сумма – 93,4 миллион евро тўланди. Испанияда чоп этиладиган Marca спорт газетасининг ёзишича, 2009 йилда сотилган “Реал” футболкаларининг 40 фоизидан ортиғида Роналду ёзуви бўлган.
Иккинчи сабаб: оғир ўтган болалик. Криштиану Роналдунинг тарихини иложсиз нарсанинг рўёбга чиқиши деса бўлади: камбағал оиланинг ўғли суперюлдуз ва миллиардерга айланди. Оммага бундай ҳикоялар ёқмай қолмайди, албатта.
Роналду Мадейра оролининг (Португалия) Фуншал шаҳрида вояга етди. У икки опа ва акадан кейин тўртинчи фарзанд. Рўзғор тебратиш учун онаси меҳмонхонада ошпаз ва фаррош бўлиб ишлади. Ишсиз ва ичкиликбоз бўлган отаси маҳаллий “Андоринья” футбол клубига администратор бўлиб ишга кирди, лекин кечқурун вақтини яна барларда ўтказар эди. Роналду соатлаб тўп тепар, пляжда югуриб юрар, дарахтларга осиларди. Тиниб-тинчимаслиги кейинчалик унинг тезкор ва абжир футболчига айланишига таъсир кўрсатмай қолмади. У 12 ёшида “Спортинг” академиясига қабул қилинди, бу ерда ўта тиришқоқлиги билан ҳаммадан ажралиб турди, машғулотлардан олдин ва кейин ҳам ўз устида ишлашдан чарчамади. Кейичалик мураббий Алекс Фепгюсон журналистлар билан суҳбатда шундай деган эди: “Биз муваффақиятга эришиши усун Роналдуга фақатгина восита ва имкон бердик. Унинг машғулотларга нисбатан муносабатини таърифлаб бўлмайди. У энг яхши ўйинчи”.
Мутахассис фикри
Наринэ Каприелян, PRP Weber Shandwick Аffiliate Company (Россия) коммуникация агентлигининг ката вице-президенти:
“Роналду – ўхшаши йўқ персонаж. Бир томондан, у ўта истеъдодли, бу – факт. Иккинчи томондан, ўта меҳнаткаш, бу ҳам факт. У тинмай ишлади ва суперюлдуз мақомига эришди. Роналду ҳисларини кўрсата олади, у шунчаки гол урадиган машина эмас. Футбол майдонида қандай бўлса, ҳаётда ҳам шундай. Суперюлдуз Роналду билан оддий Роналду ўртасида ҳеч қандай фарқ йўқ”.
Учинчи сабаб: ижтимоий тармоқлардаги фаоллиги. Роналду, шубҳасиз, ижтимой тармоқлардан фойдаланадиган спортчиларнинг энг машҳури. Унинг Фейсбукда 117,2 миллион, Инстаграмда 81,1 миллион, Твиттерда 47,9 миллион мухлиси бор. Hookit таҳлил палатформаси футболчининг ижтимоий тармоқлардаги промо-фаоллигини 176 миллион долларга баҳолаган. Ижтимоий тармоқларнинг маркетинг самарадорлиги бўйича рейтингида иккинчи ўрин 23,6 миллион доллар билан америкалик баскетболчи Стефен Каррига эгаллаган. Орадаги фарқни ўзингиз кўриб турибсиз.
Hookit ҳисоб-китобига қараганда, Роналду томонидан қолдирилган ҳар бир рекламали постга ўртача 651 778 та жавоб (лайклар, репостлар, изоҳлар) бўлади.
Тўртинчи сабаб: яхши ном. 2005 йилда Роналду жинсий зўрлашда гумон қилиниб ҳисбга олинди, аммо айбсизлиги исботини топди. Ўшандан бери футбол юлдузининг исми ҳеч қандай маш-машаларда тилга олингани йўқ. Айтиш керакки, у хайрия ишларида анча фаол, бу мақсадларда 10 миллион евродан ортиқ маблағ сарфлади.