АҚШ вице-президенти Жо Байден Украинага қилган сафари чоғида жаҳон ҳамжамиятини Россия хавфидан огоҳлантирди, дея хабар бермоқда Reuters агентлиги.

Жо Байденнинг Украинага душанба куни амалга оширилган ташрифи вице-президент сифатидаги сўнгги сафари бўлиб қолди. 20 январь куни ўз лавозимини тарк этаётган АҚШ вице-президенти Доналд Трамп ҳукуматини Украинани қўллаб-қувватлашда давом этишга чақирди.

«Ҳам коррупсия ҳам Кремлнинг тўхтовсиз агрессиясига қарши курашяпсиз. Халқаро ҳамжамияти Россиянинг зуғуми ва тажовузига қарши бир тану бир жон бўлиб қарши туриши керак», деб айтган америкалик мулозим Украина президенти Пётр Порошенко билан иштирок этган матбуот анжуманида.

Россия ва Украина муносабатлари 2014 йилнинг март ойида Қрим яримороли Россия таркибига қўшиб олиниши ортидан ёмонлашган эди. Бу ҳодиса уфайли АҚШ-Россия муносабатларини «совуқ уруш» давридан бери энг ёмон даражага тушиб кетган, Обама маъмурияти томонидан Россияга қарши иқтисодий ва сиёсий чекловлар жорий этилган.

20 январь куни АҚШ президенти сифатида қасамёд қилиши кутилаётган Доналд Трамп якшанба куни Лондон Таймс нашрига берган интервьюсида Россия билан ядровий қуроллар бўйича келишувга эришилса, санкциялар беко қилиниши мумкинлиги ҳақида гапирган.