Россия ташқи ишлар вазири Сурияда тинчлик ўрнатиш бўйича Остонада ўтказилиши режалаштирилган музокараларга АҚШ вакиллари ҳам таклиф қилинганини тасдиқлади. Бу ҳақида Al Jazeera ​ хабар бермоқда.

Сергей Лавров сешанба куни матбуот анжуманида бу ҳақида маълум қилган. Унинг айтишича, Россия АҚШнинг янги сайланган президенти Доналд Трампнинг терроризмга қарши курашга эътиборини қўллаб қувватлайди.

Россиялик дипломат ўз нутқида рус ва америкалик мутахассислар ўртасида “Сурияда терроризмга қарши кураш” бўйича музокаралар Қозоғистон пойтахтида бошланишига умид билдирган: «Умид қиламизки, янги ҳукумат бу таклифни қабул қилади».

Сергей Лавров Россия томони Сурия инқирозини ҳал этишда АҚШнинг янги ҳукумати билан бўладиган ҳамкорлик Обама давридагидан кўра анча самаралироқ бўлишини кутаётганини таъкидлаган.

Сурияда тинчликка эришиш бўйича Россия ва Туркия воситачилигидаги тинчлик музокаралари 23 январь куни Остона шаҳрига бўлиб ўтиши кутилмоқда. Сурия ҳукумати ва исёнчи гуруҳлар вакиллари тинчлик конференциясида иштирок этишни тасдиқлашган. Аввалроқ, Туркия Ташқи ишлар вазирлиги ҳам музокараларга АҚШ таклиф қилингани ҳақида хабар берган эди.