Сурия ҳукуматига қаршли кучлар икки ой муқаддам ИШИД томонидан эгалланган қадимий Палмира шаҳрида назоратни қўлга киритди, дея хабар бермоқда Guardian​ нашри.

Эрон дастагидаги шиа жангарилари ва Россиянинг махсус кучлари ёрдамида Сурия армияси пайшанба куни шаҳарга кирган. Палмирани қайта қўлга киритиш учун жанглар узоқ ва оғир ўтган. ИШИД томонидан шаҳарнинг Қадимги Рим давридан қолган харобалари бўйлаб миналар қўйилган.

Россия президенти Владимир Путин ҳукумат кучларини Палмиранинг олиниши билан табриклади. Палмира жангида Россия армиясига қаршли махсус ҳарбий бўлинмалар ҳам иштирок этган.

Хабар қилинишича, қадимий Палмира шаҳридаги бир неча минг йиллик архитектура ёдгорликлари ИШИД томонидан вайрон қилинган. ИШИД жангарилари Рим амфитеатри ва кутубхонадан қатлгоҳ сифатида фойдаланишган.

Палмира шаҳри илк бор ўтган йилнинг март ойида Россия кучлари кўмагида Сурия армияси томонидан қўлга киритилган эди. Ўтган йилнинг декабрь ойида шаҳарга ИШИД аъзолари ҳужум қилиб, шаҳарни эгаллаб олишган эди.

Сўнгги ойлар давомида ИШИД тасарруфидаги ҳудудларни бой бермоқда. Ироқ армияси халқаро коалиция кўмагида Мўсулни озод қилиш учун бир неча ойдан буён ҳарбий ҳаракатларни амалга оширмоқда. Ҳозиргача шаҳарнинг шарқий қисми тўлиқ ҳукумат кучлари назоратига ўтган. Мўсулнинг жануби-ғарбида эса тўқнашувлар давом этмоқда.

Февраль ойида ИШИД гуруҳи Суриянинг ал-Боб шаҳрини Туркия дастагидаги Сурия озодлик армияси кучларига бой берган. ИШИД жангарилари асосан ўзларининг норасмий пойтахти бўлган Раққа томон чекинмоқда. ИШИД раҳбарлари ҳам Раққада эканлиги тахмин қилинмоқда.