Тулада ўз ватандошларидан товламачилик йўли билан пул ундириб келган ўзбек диаспораси раҳбари қўлга олинди. Маълумотларга қараганда, 70га яқин ўзбек мигрантлари «Ҳамдўстлик» ҳамжамияти раҳбари Толиб Исажонов устидан полицияга мурожаат қилишган.

Туладаги «Ҳамдўстлик» жамоат ташкилоти раҳбари Толиб Исажонов қурилиш объектларидан бирида ўз ватандошларидан навбатдаги ойлик «йиғимлар»ни ундираётганида куч тизими ходимлари томонидан қўлга олинган.

Маълум бўлишича, ўзбекистонлик юзлаб мигрантлар унга ҳар ойда 2 минг рублдан «бож» тўлаб келишган. Россиянинг НТВ телеканали Толиб Исажоновнинг мигрантлардан ундирилган пуллар ҳисобига Тулада қурдирган муҳташам уйини кўрсатган.

Россиялик терговчиларнинг маълумот беришича, Туладаги бир нечта қурилиш объектлари ва бир кафе Исажоновга тегишли бўлган.

Унинг уйида ўтказилган тинтув вақтида оператив ходимлар кўплаб молиявий ҳужжатлар, тўппонча ўқлари ва Ўзбекистон фуқаролари рўйхати топишган.

Айни вақтда, суд томонидан Исожоновга нисбатан 2 ойлик вақтинча ҳибсда сақлаш чораси қўлланилган. Яқин орада унга нисбатан “таъмагирлик” ва “Россия чегарасини ноқонуний кесиб ўтиш” айби қўйилади.