Американинг турмуш даражасини кузатиш билан шуғулланувчи Mercer konsalting​ фирмаси дунё шаҳарларининг яшаш учун яроқлилик рейтингини эълон қилди. Муаллифлар рейтингни тузишда жаҳондаги 450 та шаҳарни ўрганиб чиқишган.

Эълон қилинган рейтингдан 231 та шаҳар ўрин олган бўлиб, Ўзбекистон пойтахти рўйхатда 205 ўринга лойиқ кўрилган. Тошкент шаҳри Марказий Осиёда Қозоғистоннинг Олма-Ота (178 ўрин) шаҳридан кейин иккинчиликни эгаллаб турибди. Рейтингда Бишкек шаҳри 207, Ашхобод 211, Душанбе эса 215 ўринда қайд этилган.

Собиқ иттифоқ давлатлари орасида Литва пойтахти Вилнюс шаҳри биринчиликни (81 ўрин) эгаллаб турибди. Рейтингда 168 ўрин Россия пойтахти Москвага берилган бўлса, Украина пойтахти Киев шаҳри 174 ўринга лойиқ кўрилган.

Австрия пойтахти Вена шаҳри яшаш учун энг мақбул шаҳар деб топилган. Кейинги ўринлардан Цюрих (Швейтсария), Окланд (Янги Зеландия), Мюнхен (Германия) ва Ванкувер (Канада) шаҳарлари ўрин олган. Кучли ўнталикка Германиянинг учта шаҳри киритилгани ҳолда, АҚШ ва Буюк Британиянинг энг яхши шаҳарлари (мос равишда Сан-Франсиско ва Лондон) 29 ва 40 ўринларда қайд этилган.

Ироқ пойтахти Бағдод шаҳри яшаш учун энг номақбул шаҳар деб топилган (231 ўрин). Энг ёмон шаҳарлар рейтингида кейинги ўринларни Бангуй (Марказий Африка Республикаси), Сана (Яман), Порт-о-Пренс (Гаити) ва Хартум (Судан) шаҳарлари эгаллаган. Сурия пойтахти Дамашқ шаҳри энг ёмон шаҳарлар рўйхатида 7 ўринга лойиқ кўрилган.

Рейтингни тузишда сиёсий, ижтимоий, иқтисодий, маданий ва экологик муҳит, тиббий хизмат, жамоат транспорти, мактаблар ва таълим олиш учун яратилган шароит, дам олиш муассасалари, бирламчи истеъмол маҳсулотлари ва турар-жой олиш имконияти ҳамда табиий иқлим шароити ҳисобга олинган.

Business Insider​ нашри мазкур рейтингга изоҳ берар экан, Тошкент шаҳри 1991 йилдан бери улкан иқтисодий, маданий ва архитектура борасида улкан ютуқларга эришгани, аммо шаҳарнинг экологик ҳолати энг катта муаммо эканлигини қайд этган.