Россия Федерацияси президенти Владимир Путин Россия ва Франция ўртасида дипломатик алоқалар ўрнатилганининг 300 йиллик юбилейи муносабати билан Парижда меҳмон бўлади, дея хабар бермоқда France 24​ телеканали.

Бу йил Россия императори Пётр I илк бор Францияга ташриф буюрганига уч аср тўлади. Франциянинг янги президенти Эммануэл Макрон шу муносабат билан 29 май куни Версал саройида бўлиб ўтадиган тадбирга россиялик ҳамкасбини таклиф қилган. Бу Франциянинг янги раҳбари ва РФ президенти ўртасидаги илк учрашув бўлади.

Тадбир доирасида Пётр Ининг Францияга ташрифига оид кўргазма ҳам очилади. Бугунги жаҳон сиёсатида қарама-қаршиликларга қарамай, Путиннинг мазкур санада Парижга сафар қилиши алоҳида рамзий маънога эгалиги таъкидланмоқда. Сўнгги йилларда Франция ва Россия Федерацияси ташқи сиёсатда Сурия ва Украина масаласида «келиша олишмаяпти».

Бундан ташқари, Москва Францияда яқинда бўлиб ўтган президентлик сайловида Макронниг рақиби Марин Ле Пенни қўллаб-қувватлаган. Шунинг учун Макрон ва Путиннинг учрашуви кўпчиликни қизиқтириши аниқ. Франция президенти илгари Россия томонидан Суриянинг Ҳалаб шаҳри бомбардимон қилинишини қоралаган эди.

Шу билан бирга, Макроннинг сайловолди кампаниясига амалга оширилган киберҳужумларда ҳам Россиянинг қўли борлиги гумон қилинган эди. Макроннинг мулозимлари Россияни унга қарши хакерларни ишга солишда айблашган. Япониянинг киберхавфсизлик билан шуғулланувчи Trend Micro​ фирмаси эса ҳужумлар Росциайдан бўлгани «99 фоиз аниқлиги» ҳақида маълум қилган.

Россия Федерациясининг Франциядаги элчиси Александр Орлов Эммануэл Макронни “жуда ақлли, реалист ва прагматик” сиёсатчи сифатида таърифлаган. Элчи янги президент билан муносабатлар олдингилари билан бўлгандан яхшироқ бўлишига умид билдирган.

30 май куни Париждаги Версал саройида Санкт-Петербургнинг Эрмитаж музейи билан ҳамкорликда Пётр Ининг 1717 йили Францияга қилган сафарига бағишланган кўргазма бўлиб ўтади. Мазкур ташриф туфайли тарихда илк бор Франция ва Россия ўртасида дипломатик муносабатлар ўрнатилган эди.