Эрон суди АҚШ фуқаролигига эга шахсни Вашингтон фойдасига айғоқчилик қилиш айби билан ўн йилга озодликдан маҳрум қилди. Бу ҳақда Fars хабар тарқатган.

АҚШ фуқаросининг исми, жинси ва бошқа тафсилотлар ошкор этилмаяпти. У икки давлат фуқаролигига эга эканлиги маълум, лекин бу икки фуқароликдан ҳеч бир Эронга оид эмас.

Эрон адлия вазирлиги вакилининг қайд этишича, айбланувчи «разведка маълумотлари йиққан, унга тўғридан-тўғри АҚШдан буйруқ берилган».

Айбланувчида суд ҳукмидан шикоят қилиш учун 20 кун муддат бор.

2016 йил октябрида келиб чиқишига кўра эронлик бўлган америкалик тадбиркор Сиамак Намозий ва унинг отаси суд томонидан 10 йилга қамалганди. Улар ҳам АҚШ билан ҳамкорликда айбланганди.