Фаластин Исроил ва АҚШ билан барча келишувларни, шу жумладан хавфсизлик битимларидан чиқмоқда, дея хабар беради маҳаллий WAFA ахборот агентлиги Фаластин раҳбари Маҳмуд Аббосга таяниб.
Аббоснинг сўзларига кўра, Фаластин томонининг келишувлардан чиқиб кетишига АҚШнинг кўмаги билан Исроилнинг Фаластин ерларини аннексия қилиш нияти сабаб бўлмоқда. Унинг таъкидлашича, бундан буён Исроил халқаро ҳамжамият олдида босқинчи куч сифатида барча масъулиятни ўз зиммасига олади.
2020 йил январ ойида Америка Қўшма Штатлари Президенти Доналд Трамп Фаластин-Исроил можаролари бўйича "аср келишуви" шартларини маълум қилган эди. Шартлар орасида Фаластин ҳудудида жойлашган яҳудий аҳоли пунктлари устидан Исроил суверенитетининг тан олиниши ва араб давлатининг қуролли курашдан бош тортиши бор эди.
Трампнинг лойиҳаси Исроил Бош вазири Бенямин Нетаняху томонидан қўллаб-қувватланди, аммо Фаластин АҚШнинг таклифини кескин рад этди.