Буюк Британия бош вазири Борис Жонсоннинг уйда қолишга чорлаган мактублари Британияда яшовчи барча оилалар томонидан қабул қилинди деб ёзмоқда РИА Новости.

Икки ҳафта олдин Буюк Британияда карантин жорий этилган эди. Одамларга озиқ-овқат, дори-дармон сотиб олиш, уй ҳайвонларини сайр қилдириш ва қисқача "жисмоний машқлар" қилиш учун уйларини тарк этишларига рухсат берилган. Иккитадан кўпроқ кишининг тўпланиши тақиқланади.

"Бу беқарорлик туфайли сизнинг ҳаётингиз, ишингиз ва бизнесингиз қандай қийинчиликларга дуч келаётганини тўлиқ тушунаман. Аммо биз кўрган чоралар битта оддий сабабга кўра зарурдир. Агар бир вақтнинг ўзида жуда кўп одамлар жиддий касал бўлиб қолишса, Соғлиқни сақлаш тизими (NHS) шунчалик кўп беморни қабул қилишга қодир эмас, бу кўп одамларнинг ҳаёти йўқотилиши мумкинлигини англатади.

Биз инфекциянинг тарқалишини секинлаштириб, иложи борича кўпроқ одамнинг ҳаётини сақлаб қолиш учун касалхонага ётқизилган одамларнинг сонини камайтиришимиз керак. Айнан шунинг учун барча қоидалар битта нуқтага қаратилмоқда - сиз уйда қолишингиз керак", - дейилади мактубда. 

Жонсон кўплаб британияликлар қандай молиявий қийинчиликларга дуч келганини яхши тушунишини таъкидлади. "Ҳукумат сизнинг эҳтиёжларингизни қондириш ва ўзингизни ва оилангизни боқиш учун барча имкониятларни ишга солади", деб ваъда берди бош вазир.

Эслатиб ўтамиз, ҳозирда бош вазир Борис Жонсоннинг ўзи коронавирусни юқтириб олган ва Лондондаги касалхона реанимация бўлимида даволанмоқда.