Павлодар шаҳридаги савдо марказида ҳожатхонада қизларга телефон ва ойна ёрдамида яширинча қараган фуқаро қўлга олинди. Бу ҳақда Sputnik хабар қилди.
Хабарда айтилишича, 12 октябрь куни номаълум шахс кичик ойнача ёрдамида ҳожатхонада 9 ёшли қизчага қараган. Ушбу ҳолат акс этган видео тармоқда тарқалди.
Сешанба куни полиция вуайеристни қўлга олди (бу яланғоч одамни яширинча томоша қилишдан завқ оладиган инсон). У 1968 йилда туғилган Ўзбекистон фуқароси эканлиги ва Павлодардаги ресторанлардан бирида ошпаз бўлиб ишлаши маълум бўлди.
“Ушбу ҳолат юзасидан Жиноят кодексининг 124-моддаси вояга етмаганларни аҳлоқсизликка ўргатиш моддаси бўйича суриштирув олиб борилмоқда. Ҳозирги вақтда гумонланувчига нисбатан эҳтиёт чорасини қўллаш масаласи ҳал қилинмоқда”, - дейилган полиция хабарида.
Бу моддада беш йилдан ўн йилгача озодликдан маҳрум этиш жазоси назарда тутилган.