Қозоғистонда коронавирусни юқтирганлар сони ошиб бормоқда

Қозоғистонда коронавирусни юқтирганлар сони ошиб бормоқда

Қозоғистонда коронавирус инфекциясини юқтирганлар сони олти кишига етди, деб хабар қилмоқда Қозоғистон соғлиқни сақлаш вазирлиги расмий вакили Диас Ахметшарип.

“Қозоғистонда коронавирусни юқтирганлар сони ҳозирча олти нафар, улардан тўрт нафари Олма-отада, икки нафари Нур-Султонда карантинга олинган“, — деди Соғлиқни сақлаш вазирлиги расмий вакили.

Шунингдек, стационар карантиндаги фуқаролар сони 1090 кишини, уй карантинидагилар сони – 452 кишини ташкил этаётгани қўшимча қилинган.

Шу билан бирга, ХХР ва мамлакатга чегарадош бўлган давлатлардан келаётган фуқаролар мониторинги давом эттирилмоқда.

Маълумот учун, дунёнинг 138 та давлатида коронавирусни юқтирганлик бўйича 145 321 ҳолат қайд этилган, шу жумладан, ХХРда – 80 813 ҳолат, улардан — 3 176таси ўлим билан якунланган. Соғайганлар сони 64 111 кишини ташкил қилган (79,3%). Стационарларда 13 526 бемор қолмоқда.

Бошқа давлатларда – 64 502 (шу жумладан, саёҳат лайнерларида ҳам) ҳолат қайд этилган, улардан – 2 238 ўлим билан якунланган(3,4%).

Италияда – 17 660 ҳолат, вафот этган – 1 439; Эронда – 11 364 ҳолат, вафот этган – 514; Жанубий Кореяда — 7 979 ҳолат, вафот этган – 71.

Францияда – 3 661 ҳолат, вафот этган – 79; Испанияда – 5 232 ҳолат, вафот этган – 133; Германияда – 3 675 ҳолат, вафот этган – 8.

Соғлиқни сақлаш вазирлиги коронавирус инфекцияси тарқалишининг олдини олишда қуйидаги профилактика чораларига амал қилишга чорлаб қолади:

  • қўлларни ва юзни тез-тез совунлаб ювиш;
  • одамлар тўпланадиган жойларга бормаслик;
  • касал одамлар билан алоқа қилишдан қочиш;

шамоллаш касаллиги белгилари пайдо бўлганида (тана ҳарорати кўтарилиши, йўтал, томоқдаги оғриқ) зудлик билан уйга тез ёрдам чақириш лозим.