Тошкент шаҳар прокуратураси томонидан жорий йилнинг 15 январь куни ижтимоий тармоқларда хусусан, “Instagram”, “Facebook” тармоқлари ҳамда “Telegram” каналларига жойлаштирилган иш ўрганувчиларни жиноят содир бўлган воқеа жойига олиб чиқиб ўқитиш жараёнида олинган суратлар асосида тайёрланган видеоролиги ҳақида баёнот берди.
Видеороликларда Тошкентда ўлдириб кетилган дизайнер Наримон Григоряннинг қонга беланиб ётган мурдаси расми аниқ-тиниқ кўрсатилган эди. Яна ўликхонадаги бир қанча тасвирлар ҳам бор эди.
Шаҳар прокуратурасининг айтишича, бу тасвирлар ички хизматда фойдаланиш учун тайёрланган бўлиб, расмий каналга жойлаштириш учун тайёрланган бошқа 4 та материал билан биргаликда оператор хатоси билан юкланган.
Шу сабабли, Тошкент шаҳар прокуратураси зудлик билан ушбу видеороликни расмий каналдан олиб ташлаш чораларини кўрди ва фуқаролардан мазкур ҳолат учун узр сўрайди, дейилади баёнотда.