Joriy yilning yanvar – aprel oylari mobaynida O‘zbekiston o‘zlashtirilgan xorijiy investitsiyalarning umumiy hajmi 2,5 mlrd dollarni, shu jumladan to‘g‘ridan - to‘g‘ri xorijiy investitsiyalar - 1,7 mlrd va xorijiy kreditlar - 831 mln dollarni tashkil etdi. Bu haqda Investitsiyalar va tashqi savdo vazirligi matbuot xizmati ma’lum qildi.
Bu davrda O‘zbekiston iqtisodiyotiga investitsiyalarni kiritish bo‘yicha Rossiya, XXR, Germaniya va Janubiy Koreya yetakchilik qildi. Shuningdek, mamlakat iqtisodiyotiga sarmoya kiritayotgan mamlakatlarning umumiy soni 37 tani tashkil etdi.
Ko‘rib chiqilayotgan davrda elektrotexnika sanoati (2019 yilning shu davriga nisbatan o‘sish - 24 barobar), kimyo sanoati (o‘sish - 13 barobar), charm va poyabzal (o‘sish - 2,5 barobar) sohasi investorlar uchun eng jozibador bo‘lib qoldi. Neft va gaz sanoati (o‘sish – 2,3 barobar) va qurilish materiallarining ishlab chiqarilishi (o‘sish – 1,6 barobar) ham yaxshi ko‘rsatkichlarni namoyish etdi.