20 avgust kuni Mozori-Sharif shahri yaqinidagi temir yo‘l qo‘riqchilariga hujum uyushtirilishi oqibatida bir nafar o‘zbekistonlik jarohatlangan, ikki nafar afg‘onistonlik halok bo‘lgan.

Surxondaryo viloyati hokimligi matbuot xizmatining ma’lum qilishicha, hujum oqibatida jarohatlangan O‘zbekiston fuqarosi – «So‘g‘diyona trans» korxonasining koordinatsiya bo‘limi boshlig‘i o‘rinbosari Termiz shahridagi kasalxonaga yetkazilgan.

Avvalroq, «So‘g‘diyona trans» korxonasi ishchi-xodimlarini ish joyiga olib ketish uchun kelgan mas’ullar Hayraton ishchilar yashash bazasidan chiqishganda hujumga uchragani aytilgan edi.