Afg‘onistonda 14 yoshli Kamar Gul ismli qiz Kalashnikov avtomati bilan Tolibon harakatining ikki jangarisini o‘ldirdi, bir qanchasini yaraladi. Va bu orqali Gul ota-onasini o‘ldirgan Tolibondan o‘ch oldi, deb yozmoqda "Rossiya gazetasi".

Ushbu voqea haqida France Press agentligiga intervyu bergan afg‘on politsiyachisi gapirib berdi. 

Uning so‘zlariga ko‘ra, shunga o‘xshash voqea Afg‘onistonning G‘or viloyatidagi qishloqlardan birida yuz bergan. Hodisa qachon sodir bo‘lganligi haqida ma’lumot berilmagan.

Ma’lum bo‘lishicha, jangarilar Kamar Gulning uyiga bostirib kirib, mamlakat rasmiy hukumatini qo‘llab-quvvatlagan otasini o‘ldirgan. Erini himoya qilishga uringan qizning onasi ham jangarilar qo‘lida halok bo‘lgan.

"Uyda bo‘lgan Kamar Gul uning oilasiga tegishli bo‘lgan AK-47 (Kalashnikov) avtomatini olib, avval ota-onasini o‘ldirgan jangarilarni otadi va halok qiladi, keyin esa yana bir nechtasini yarador qiladi", - dedi mahalliy politsiya boshlig‘i Habibrahmon Malikzoda.

Viloyat hokimi matbuot kotibining so‘zlariga ko‘ra, hozirda afg‘on harbiylari Gul va uning ukasini "xavfsiz joyga" olib ketishgan.