Turkmaniston savdo va tashqi aloqalar vaziri Amandurdi Ishanov ishdan bo‘shatilganidan bir necha kun o‘tgach korrupsiyada ayblanib, sud tomonidan qamoq jazosiga hukm etildi.
Turkmaniston telekanallarida qo‘liga kishan solingan bir necha odam, jumladan, Ishanovning sud zalida o‘tirgani to‘g‘risida lavha ko‘rsatildi¸ ammo sobiq vazirning necha yilga qamalgani rasman aytilmadi.
Bosh prokuror Batir Atdayev, Ishanovning 13 sentyabr kuni korrupsiya bilan bog‘liq jinoyatlarni sodir etganligini omma oldida tan olganini bildirgan. Bosh prokurorga ko‘ra, Ishanov bu jinoyatlarni taniqli tadbirkor Chorimuhammed Kulov va qator ishlab chiqarish korxonalari rahbarlari bilan hamkorlikda amalga oshirgan.
Sudning qachon va qayerda o‘tkazilgani, hukm tafsilotlari oshkor qilinmagan.
Turkmanistonlik kuzatuvchilar o‘z nomlarini aytmaslik sharti bilan OAVga «bu kabi ommaviy tan olishlar» hukumat korrupsiyaga qarshi kurashayotganini «namoyish etish uchun uyushtirilgan spektakllarga o‘xshaydi», deb fikr bildirdilar.