Сув ичиш саломатлик учун жуда фойдали. Чунки инсон организмининг 80 фоизи сувдан иборат ва танада сувга бўлган эҳтиёжнинг ошиши саломатлик билан боғлиқ муаммоларни келтириб чиқариши мумкин.

Кимдир сувни овқатланишдан аввал ичиш кераклигини айтса, яна бошқа биров уни овқатдан кейин ичган яхши, деб ҳисоблайди. Бунга илмнинг жавоби қандай? Ҳозир шу ҳақида маълумот берамиз.

Овқатдан олдин сув ичишнинг фойдали жиҳатлари:

• Бу орқали овқат таркибидаги юқори калорияларнинг танага қабул қилинишини камайтириш мумкин. Айниқса, ширинлик ва турли-туман газланган ширин сувларни кўп истеъмол қиладиганлар учун овқат маҳалида сув ичиш фойдалироқ;
• Овқатдан олдинги сув ички тана аъзоларини тозалайди. Хусусан, нонуштадан олдин сув ичишнинг шифобахш таъсирлари кўп. Бу сув қондаги заҳарли модда – токсинларни ювиб чиқаради, ошқозон ва ичакларни тозалаб, йўғон ичакни тиқинлардан тозалайди, лимфа – организмда қон билан тўқималар ўртасида модда алмашинувини таъминловчи суюқликнинг меъёрида бўлишини таъминлайди;
• Шу билан бирга, тонгда ичилган сув тана аъзоларининг ўзаро модда алмашинуви жараёнини фаоллаштириб, ички аъзоларнинг кун давомида самарали фаолият кўрсатишини таъминлайди;
• Танадаги намлик мувозанатини таъминлайди. Инсон уйқудан уйғонганида унинг танасидаги намлик камайиб,       тана қуриб қолган бўлади ва у суюқликка зарурат сезади;
• Хусусан, сув бўғимларни намлаб, оғриқлардан халос қилади, эрта емирилишининг олдини олади. Қуриган танага егуликнинг тушиши ошқозон учун ҳам оғирлик қилиши мумкин;
• Қон таркибининг 80 фоизи сувдан иборат, унда янги қон таначалари шаклланиши учун сув зарур бўлади.  Шу боисдан ҳам, тонгги маҳалда овқатдан аввал сув ичганда инсон янада тетиклашади.

Овқатдан кейин сув ичишнинг фойдали жиҳатлари:

• • Овқатдан кейинги сувнинг ҳазм жараёнига катта ёрдами тегади. Кўпчилик буни зарарли одат деб ҳисоблайди. Аммо Американинг Майо шифохонаси шифокори Майкл Пикконинг сўзларига кўра, овқат маҳалида сув ичишнинг ташвишли ери йўқ. Сабаби – сув ошқозонга овқатни ҳазм қилишига, айниқса егулик таркибидаги моддаларнинг танага сўрилишига ёрдам беради;
  • Шунингдек, сўнгги йилларда совуқ сувни ичиш саратон, семизлик ва бошқа касалликларнинг келтириб чиқарувчиси эканлиги ҳақида миш-мишлар юрибди. Аммо бу фикрлар Колумбия университетининг тадқиқотчи мутахассислари томонидан қатъиян рад этилган.

Гувоҳи бўлганингиздек, овқатдан олдин ҳам, овқатдан кейин ҳам сув ичишнинг фойдали жиҳатлари бор экан. Илм-фан ҳали унинг зарар ёки камчиликлари хусусида аниқ бир тўхтамга келгани йўқ. Шу сабабли, ўзингизни таъбингиз ва эҳтиёжингиздан келиб чиқиб, кун давомида керакли сув миқдорини қабул қилинг.