Ўзбекистон лойиҳа қиймати 11,2 миллиард доллар бўлган Афғонистондаги темир йўл қурилишида иштирок этади

24.01.2018 | Ўзбекистон | 2978

Афғонистон президенти Ашраф Ғани ва Ўзбекистон бош вазири ўринбосари, молия вазири Жамшид Қўчқоров Кобулда Мозори Шариф – Ҳирот темир йўлининг қурилишини муҳокама қилди. 

Қўчқоровнинг сўзларига қараганда, лойиҳани баҳолаш ишлари якунланган, айни пайтда унинг Ўзбекистон тижорат банклари ҳамда Осиё инфраструктур инвестициялар банки томонидан молиялаштирилиши борасида музокаралар бормоқда.

Темир йўл қурилиши Афғонистон ва Ўзбекистон учун, шунингдек, бошқа давлатлар учун ҳам муҳим аҳамият касб этади. Лойиҳанинг амалга оширилиши Афғонистондан Хитойга Андижон орқали уч кунда етиб олиш имконини беради.

Ўз навбатида, Ашраф Ғани мамлакатлар ўртасида инфраструктуралар бўйича ҳамкорликнинг кенгайиши аҳоли турмуш тарзини яхшилаш ва минтақани ривожлантириш имкониятини беришини таъкидлаб ўтди.

Лойиҳа қиймати 11,2 миллиард долларни ташкил этиши кутилмоқда.