Тошкентда "шапка" сўраган автосалон директори ва унинг шериги қўлга олинди

19.05.2018 | Жамият | 2955

Тошкент шаҳар ИИББ Жиноят қидирув бўлими ходимлари пора эвазига автомобил таклиф қилган шахсни қўлга олиш бўйича операция ўтказди. Бу ҳақда Тошкент ИИББ матбуот хизмати хабар бермоқда.

"Пойтахтлик икки шахс "Нексия-3" русумли автомобилни 3 минг доллар устама ҳақ эвазига қисқа муддатда етказиб беришни таклиф қилгани, улардан бири бевосита шу соҳага алоқадор шахс эканлиги аниқланган", — дейилади матбуот хизмати хабарида.

Олиб борилган тезкор тадбир натижасида талаб қилинган суммани олаётган вақтда ижтимоий фондлардан бирининг ишчиси, 63 ёшли Аброр.Г ҳамда унинг шериги — "Ўзавтотеххизмат" МЧЖ автосалонларидан бирининг директори Муҳаммадали.У (исмлар ўзгартирилган) қўлга олинган.

Мазкур ҳолат бўйича Ўзбекистон Жиноят кодексининг 168-модда 2-қисми ("фирибгарлик") ва 211-модда 2-қисми ("пора бериш") бўйича жиноят иши қўзғатилди.