Россия президенти Владимир Путин туркиялик ҳамкасби Ражаб Тойиб Эрдўғонга телеграмма йўллаб, Кайсери шаҳрида юз берган теракт муносабати билан ҳамдардлик билдирди.

“Ишончим комилки, экстремистик гуруҳларга қарши янада қатъийроқ кураш бундай жиноий ҳамлаларга қарши жавоб бўлади. Россия антитеррор соҳасида Туркия билан ҳамкорликни янада кенгайтиришга тайёр”, – дейилади телеграммада.

Эслатиб ўтамиз, бугун Туркиянинг Кайсери шаҳридаги Эржиес унивеситети ёнида маҳаллий вақт билан соат 08:45да теракт содир бўлди. Худкуш ҳужумчи бошқарувида бўлган автомобиль ҳарбийлар ҳам кетаётган жамоат автобуси ёнида портлади. Автобус светофорнинг қизил чироғида тўхтаб турган бўлган. Ҳодисада 13 ҳарбий хизматчи ҳалок бўлди, 56 киши яраланди.

Туркия Ички ишлар вазири Сулейман Сойлу худкуш террорчининг шахси аниқланганини маълум қилди. Терактни уюштиришда гумонланиб 7 киши қўлга олинган, 5 киши қидирилмоқда.