Кореялик мутахассис Ўзбекистон соғлиқни сақлаш вазирига ўринбосар этиб тайинланди

11.02.2019 | Тиббиёт | 4649

Ўзбекистон Республикаси президентнинг қарори билан Донгвук Ли Ўзбекистон Республикаси соғлиқни сақлаш вазирининг ўринбосари ва Ўзбекистон Республикаси Бош вазирининг ижтимоий ривожлантириш масалалари бўйича ўринбосари маслаҳатчиси лавозимига тайинланди. Бу ҳақда соғлиқни сақлаш вазирлиги матбуот хизмати хабар қилди.

Донгвук Ли соғлиқни сақлаш соҳасига илғор хорижий тажрибаларни жорий этиш бўйича таклифлар тайёрлаш ва ислоҳотларни эксперт жиҳатдан қўллаб-қувватлаш масалаларига масъул бўлади.

Кореялик мутахассис шу вақтга қадар Корея Республикасининг Соғлиқни сақлаш ва ижтимоий ҳимоя вазирлигида демографик сиёсат бўйича вазирнинг ўринбосари эди.

Шунингдек, унга халқаро стандартлар ва ЖССТ тавсиялари асосида соҳани комплекс ҳуқуқий тартибга солиш, тизимни молиялаштириш ва ташкил этиш, мажбурий тиббий суғуртани жорий этиш, давлат-хусусий шериклик ва тиббий туризмдан фойдаланишнинг энг яхши амалиётларини юртимизда қўллаш, инвестицияларни жалб этишда қулай шарт-шароитлар яратиш ва рақобат муҳитини яхшилаш ҳамда "электрон соғлиқни сақлаш" тизимларини кенг татбиқ этиш каби вазифалар ҳам юклатилди.